भिवंडी : भिवंडी तालुक्याच्या पडघा केंद्रातील समतानगर, बोरिवली येथील जिल्हा परिषदेच्या मराठी शाळेत १५ ऑक्टोबर २०१९ रोजी डॉ. ए. पी. जे. अब्दुल कलाम यांच्या ८८व्या जयंतीनिमित्त वाचन प्रेरणा दिन साजरा करण्यात आला.
डॉ. ए. पी. जे. अब्दुल कलाम यांच्या प्रतिमेला पुष्पहार अर्पण करून युवा कवी मिलिंद जाधव यांच्या हस्ते कार्यक्रमाचे उद्घाटन करण्यात आले. ‘डॉ. ए. पी. जे. अब्दुल कलाम यांना जेवढे वाचाल, समजून घ्याल, तेवढी प्रेरणा तुम्हाला मिळेल. रोज वर्तमानपत्रे, पुस्तके, कविता, लेख वाचा. त्यामुळे वाचनाची आवड निर्माण होईल. वाचनाने ज्ञान वाढते आणि त्याच ज्ञानाच्या जोरावर आपण वैचारिक चर्चा करू शकतो. चारचौघांत आपले मत मांडू शकतो. सत्याची बाजू मांडू शकतो. ज्ञान ही आपली मोठी ताकद आहे. त्याच जोरावर आपण शिखर गाठू शकतो,’ असे मिलिंद जाधव यांनी विद्यार्थ्यांना सांगितले. त्यांनी विद्यार्थ्यांसमोर ‘प्रेरणा’ ही कविता सादर केली.
डॉ. ए. पी. जे. अब्दुल कलाम यांच्या जीवनकार्याबद्दल मुख्याध्यापिका सुरेखा जाधव, सहशिक्षिका भावना घरत यांनी मार्गदर्शन केले. मराठी साहित्यातील कविता समजाव्यात म्हणून विद्यार्थ्यांना वाचनासाठी १० कवितासंग्रह मिलिंद जाधव यांनी भेट म्हणून दिले. विद्यार्थ्यांकडून कथा, कविता, लेख यांचे वाचन करून घेतले.
